top of page

不同的服務提供者

Updated: Aug 7, 2020

精神健康服務團隊有唔同嘅行業,究竟唔同行業有咩分別呢? 老實講,我地喺準備呢個專輯嘅時候,都覺得好頭痛,因為香港嘅精神健康服務唔成熟,資源分配無清晰嘅藍圖,所以行業之間分工不清,服務有好多重疊位,而看似相關嘅行業多到眼都花。再者,雖然有啲專業(例如精神科醫生)接受過深入嘅精神科訓練,但執業時礙於現實限制(例如係政府醫院要「秒殺」求診人士),服務往往不盡人意;相反,有啲專業(例如社工)嘅訓練雖然唔係特別針對精神健康,但由於接觸大眾機會多,唔少會自己進修有關知識,因此成為很好嘅服務提供者。所以呢個專輯只可以介紹一下唔同行業本身嘅角色係做啲乜嘢(恕今次未能將市面所有行業一一盡錄,今次主要介紹响政府機構主力負責精神健康嘅行業),至於實際情況如何,或者個別從業員自己進修咗啲乜嘢心理治療或輔導課程,係咪有資格提供相關治療等等,服務使用者不妨主動問清楚對方嘅培訓同資格。如果唔舒服想搵人幫手、尋求協助的話,可參考之前嘅post: 《有關精神健康服務的常見問題》 https://goo.gl/yXAL3Z。 另外,唔係每個專業都有註冊制度,冇註冊制度嘅行業就冇法例監管,即係話任何人都可以自稱為該行業嘅從業員,訓練同質素會好參差。面對冇註冊制度保障嘅行業,服務使用者需要仔細了解該學歷嘅認受性,甚至要求對方出示學歷證明,以政府機構認可嘅標準為基礎。


精神科醫生 Psychiatrist

精神科醫生讀醫科出身,同所有醫生一樣,重視實證為本嘅治療 (evidence-based treatment),對身體嘅結構、生理作用、藥物同醫療儀器嘅應用比較熟悉。亦可以開病假紙,同埋有權強制入院。

响精神健康服務方面,精神科醫生會特別精通腦部構造、腦部化學物質傳遞嘅情況,同各種精神困擾嘅關係。佢哋大多數都喺醫院工作,會服務需要入院、受較為嚴重精神困擾嘅人士,所以對於緊急或嚴重嘅情況有多啲經驗。同其他精神專業唔同,佢哋可以喺診治過程中做一啲相關嘅醫療檢查,例如抽血、腦部磁力共振等。雖然精神科醫生嘅訓練亦包括輔導技巧,但佢哋嘅治療仍然以精神科藥物或醫療儀器為主。

參考資料: 香港醫務委員會 http://www.mchk.org.hk/e_index.html

香港醫務委員會 註冊精神科(專科)醫生 http://tiny.cc/5n5r7y (7.2020更新)


臨床心理學家 Clinical Psychologist/CP

首先要搞清楚,係冇「心理醫生」嘅,因為臨床心理學家並唔係醫科背景,所以唔係「醫生」(香港法例亦唔容許非醫科背景嘅人自稱「醫生」)。因為心理學應用廣泛,所以心理學家有好多種(例如教育心理學家、工業與組織心理學家等),而臨床心理學家只係其中一種。同其他心理學家一樣,臨床心理學家擅長分析服務對象嘅想法、行為、環境等互動關係,並應用係工作上。

臨床心理學家嘅訓練以精神健康為主,熟悉各種精神困擾嘅診斷,從服務對象嘅成長背景、經歷、以及日常生活模式理解服務對象所面對嘅困難,並提供以實證為本嘅心理治療(evidence-based treatment),診治受精神困擾嘅人士。臨床心理學家主要透過面談同埋練習嚟做評估及心理治療。佢哋與服務對象共同疏理出困擾住佢哋嘅癥結,協助佢地紓緩精神困擾帶來嘅影響。

要注意嘅係,雖然臨床心理學家係獲認可嘅精神專業,而政府亦係唔同嘅部門(例如醫院、社署、懲教署)都設置左呢個職位幾十年,但香港仍然未有臨床心理學家嘅註冊制度!由於未有註冊制度,有啲未受專業訓練嘅人可能亦會自稱「心理學家」。因此,服務使用者係尋求幫助時,可以多詢問對方嘅資歷以保障服務質素。大家亦都可以參考歷史最悠久嘅「香港心理學會臨床心理學組」 (HKPS DCP) 嘅會員名冊,名冊上嘅臨床心理學家均受政府公營機構認可。

參考資料: 香港心理學會臨床心理學組 https://hkps-dcp.org.hk/en/for-public-en

香港心理學會 註冊臨床心理學家名單 非政府(志願)機構:http://tiny.cc/8p4r7y (4.2020更新) 私人執業:http://tiny.cc/ju4r7y (4.2020更新)


家庭科醫生 Family Medicine Practitioner

家庭醫學專科同普通科醫生唔同,係一門專科,佢哋嘅特點係對所有專科 (包括精神科)有一定嘅認識,亦識得診斷同治療輕度至中度嘅精神病同情緒病,可以開相關嘅藥物。

要注意,家庭醫生同普通科醫生(GP)係唔一樣㗎,普通科醫生唔係專科醫生,同家庭醫生既訓練亦好唔同,我地落街見到嘅多數(非全部)都係普通科醫生,開藥嘅權限亦都較細。普通科醫生主要會留意求診人士嘅身體同心理狀態,作出合適嘅轉介,例如臨床心理學家或者精神科醫生。

都係一句,大家要多多留意執業者嘅資格同訓練,有咩問題都可以主動問,了解多啲。

參考資料: 香港醫務委員會 http://www.mchk.org.hk/e_index.html


精神科護士 Psychiatric Nurse

精神科護士嘅角色係支援服務使用者,而唔係診斷同治療,所以佢哋通常係喺精神服務團隊嘅成員,好少自己單獨掛牌提供服務。精神科護士同普通科護士一樣,都係以照顧病人為己任,為服務使用者提供適切嘅護理,唔同在於佢哋嘅主要嘅服務對象係受精神困擾嘅人士,所以對於唔同嘅精神科診斷、服務使用者嘅心情等等,會有多啲了解同認識。

响精神健康服務方面,精神科護士嘅服務範圍主要包括駐院同社康服務兩種。駐院護士主要喺醫院工作,為服務使用者提供院內護理服務,評估精神狀態、監察食藥嘅進度同效果、提供適切嘅護理,亦會教導服務使用者及家屬有關精神病嘅知識同支援方法,促進復元。社康護士就透過家訪提供以上外展護理服務,令服務使用者唔駛去到醫院都可以接受到服務,社康護士亦會提供熱線同危機處理服務。

參考資料: 香港護士管理局 http://www.nchk.org.hk/tc/home/index.html


社會工作者 Social Worker

社工了解社會福利制度同資源安排(例如公屋、綜援),亦熟悉現有嘅服務同申請渠道。佢地服務嘅對象種類繁多、範疇廣泛。日常工作包括個人輔導、危機處理、小組工作、外展服務、籌辦活動等。此外,由於社工經常接觸社會上有需要嘅人士,所以比較理解問題根源同社會制度嘅關係,因此,社工亦會參與倡議、充權、推動政策改革等,宏觀咁推動社會改變。

响精神健康服務方面,社工會做簡單嘅心理評估、輔導,同埋提供轉介服務(例如臨床心理學家),對受精神困擾人士黎講係重要嘅支援。此外,社工亦會喺唔同嘅層面,例如個人、家庭、社區推廣精神健康 ,提升公眾對精神健康嘅意識。值得一提嘅係,社會福利署於各區設有精神健康綜合社區中心,中心嘅社工都會好熟悉香港嘅精神健康服務。

參考資料: 社會工作者註冊局 https://www.swrb.org.hk/tc/


輔導員 Counselor

輔導員本身嘅訓練唔係針對精神病患,而係對一般大眾可能遇到嘅問題,例如學業、職業、婚姻等,透過面談引導服務使用者思考自己嘅需要,從而疏理出解決方法。有唔少輔導員本身都係社工,亦有來自各行各業、透過報讀輔導課程而成為輔導員。部分社福機構會先安排服務使用者會見輔導員,有需要嘅就會再轉介面見臨床心理學家。

要注意嘅係,輔導員喺香港無註冊制度,未受認可嘅人都可以自稱「輔導員」,現時亦無行內公認嘅註冊團體或學歷。所以要保障所獲服務嘅質素,服務使用者最好都係搵喺有信譽嘅社福機構內任職、或者有專業人士介紹嘅輔導員、或者問清楚對方受過嘅訓練穩陣啲。


職業治療師 Occupational Therapist/OT

職業治療師嘅職責係協助服務使用者適應日常生活(雖然名為「職業」令人聯想到返工,但其實個人自理,湊小朋友,甚至連休閒活動等都包括在內)。傳統上佢哋喺醫院工作,服務對象包括所有因患病而影響日常生活(例如因中風而手腳無力),需要重新學習適應嘅人士。佢哋會為服務對象度身訂造活動,利用儀器輔助或者透過小組練習,令服務對象可以發揮自己喺生活上原本嘅角色。

响精神健康服務方面,職業治療師有特別針對精神病復元人士嘅服務,提供日常自我照顧嘅訓練以及其他職業培訓(例如生活重整,社交訓練等等),協助復元人士應付生活嘅困難,或者重新投入職場。

參考資料: 職業治療師管理委員會 http://www.smp-council.org.hk/ot/tc/content.php?page=abt_init 香港職業治療學會 https://www.facebook.com/HongKongOTA/


朋輩支援工作員 Peer Support Worker/PSW

呢個職業係喺外國創立,近年香港政府亦新增咗呢個職位。朋輩支援工作員都係有精神病經歷嘅人,會透過自身嘅復元經驗,以過來人嘅身份,與服務使用者同行。佢哋唔會直接為服務使用者提供治療,而係從旁支援同分享經驗,促進彼此嘅復元。由於佢哋都有經歷過,由佢哋親自分享身心健康嘅知識、尋求協助嘅心得時,可能會更加有說服力。而且,同其他專業人士唔同,佢哋俾服務使用者嘅感覺會平起平坐啲,令復元人士感到被接納。呢個職業係其他精神專業唔可以取替嘅。

參考資料: 朋輩支援工作員計劃



2,959 views0 comments

Recent Posts

See All
bottom of page