© 2019 StoryTaler Hong Kong Co. Limited.

  • StoryTaler 說書人

關於精神病的一些事 (一)

呢D病名聽得多,但係你了解既有幾多,誤會既又有幾多? 小編補充: 大家睇完可能會覺得自己中左幾樣咁,其實呢個反應係好常見,正如有時睇其他生理病嘅病徵時都會覺得自己中少少咁。有無病唔係自己講嘅,而係由專業人士判斷,假如你嘅情緒受到困擾,日常生活開始受影響,就考慮搵人幫手啦。


抑鬱症

有抑鬱症既人會持續兩個星期或以上,係大部份既時間裡面,覺得抑鬱,或/及好難有開心既感覺,對事物失去興趣,訓覺同胃口可能都會有改變:可能係訓好多或者失眠,可能係無胃口或者食好多,好難專心,好易累,覺得自己好無用好無用,甚至有自殺既念頭。

佢地唔係唔想開心,相反,佢地好想擺脫呢種感覺,呢種感覺一D都唔好受,但就好似一大舊黑雲跟住你,好似每一步都踩落泥漿咁,好重好重。抑鬱症唔係一種選擇。任何人都可以有抑鬱症,同你堅唔堅強無關。就好似傷風感冒咁,我都唔想打乞痴架,我都唔想發燒架,對有抑鬱症既人來講,同樣地,我都唔想唔開心架,我都唔想覺得自己無用,你同我講「大把人慘過你啦」,「點解你咁渣咁脆弱少少事都承受唔到?」,只會令我更傷心,作為朋友,陪伴同聆聽已經好足夠!


廣泛焦慮症

顧名思義,有廣泛焦慮症(或稱經常焦慮症)既人會經常為不同既事情感到焦慮或擔心,而擔心既內容則涵蓋生活上多個範疇,例如學業、工作、健康、人際關係等,有D甚至會驚自己擔心得太多而變成痴線(事實係唔會既)。呢D憂慮通常都同現實不成正比,因此會成日比人話佢地係過度緊張。對佢地黎講,擔心好似無時無刻都出現,好難控制,而且仲會令到個人坐立不安、精神唔集中,或者腦海一片空白。由於長期處於緊張狀態,肌肉繃緊,個人好易支力、容易炆,甚至發脾氣。佢地好多時訓覺都訓得唔好,容易訓唔著,或者訓訓下都會扎醒,跟住就會擔心第日返工返學會唔夠精神。總之就係成日都覺得唔安樂,有D仲會覺得恐怖既事情隨時都會發生咁。

身邊既人會成日話佢地諗多左,跟住就叫佢地放鬆D。佢地有時都知道自己擔心得太多,但係就總係放鬆唔到。有時因為擔心對方而問多兩句,會比人話煩;預備充足D,又比人話浪費時間。其實佢地自己都好辛苦,朋友,唔好心急改變佢地既擔心,陪伴就可以啦。


強迫症

坊間對強迫症既理解多數係洗手同check下有無閂好門窗,但其實強迫症會以好多唔同既形式出現。有強迫症既人會重複地、持續地有入侵性既想法、衝動、影像,因此要被迫重複做一D特定既行為黎舒緩呢D諗法產生既焦慮。其實患者通常都意識到呢D諗法或者行為係唔理性既,但就算佢地意識到,佢地都冇辦法去擺脫呢D諗法同埋伴隨而來既焦慮,結果就會令到佢地更加心急同擔心,嚴重影響佢地既生活作息。

唔理解既人,就會問「點解你可以為左洗手遲到?」,「你搵D野分散注意力咪得囉」;「你明知自己會check野就預早D出門口啦」,「咁大個人,少少野都控制唔到? 」,唉,希望你明白我唔係特登架,你鼻敏感都無得唔打乞痴啦。


驚恐症

驚恐症呢個名好少聽,但其實十分常見!要認識驚恐症,首先要知咩係驚恐發作 (Panic Attack)。驚恐發作係幾分鐘到十幾分鐘內有湧現一種非常突然、非常強烈既驚恐,徵狀有心跳加速、出汗、手震/成個人震、好似抖唔到氣、覺得窒息、心口唔舒服、作嘔、頭暈、沾寒沾凍、手腳麻痺或刺痛、甚至感到唔真實。突然間有呢D徵狀,一個人會好易以為同埋會好驚自己係咪會失控或者痴線,或者好驚自己會死。當一個人出現驚恐發作後一個月或以上,變得好擔心會再驚恐發作,情況嚴重到對生活造成影響、造成好大困擾,咁就好大機會係有驚恐症。

英文用”Attack”呢個字描述得好好,驚恐發作真係好似一個襲擊咁,殺你一個措手不及。如果身邊有朋友有驚恐症,我地唔好急於challenge佢,「你放鬆D啦」、「你再諗就真係痴線」、「醫生都話你身體無事,唔好諗咁多啦」、「次次都入急症,去到又無事,你想點呀」,呢D 都係好hurt架。 嘗試去明白同感受佢當刻既感覺,陪住佢,已經足夠。


躁狂抑鬱症

躁狂抑鬱症,簡稱躁鬱症。躁鬱症係一種情緒高漲和低落交替嘅精神病,呢個病有細分為第一型(有典型躁狂同抑鬱嘅症狀)同第二型(有輕躁同抑鬱嘅症狀)。坊間成日講既「躁狂」、「狂躁」,以為躁底、暴力就即係「躁狂症」其實並不存在。

究竟咩叫躁狂狀態呢?處於躁狂狀態既人會情緒高漲,表現得好興奮,腦入面會有好多不同類型嘅聯想,會係咁講嘢同講得好快,突然好自信,對所有事都好有熱情好多意見,全日都可以維持興奮狀態,唔係好需要訓覺。佢地仲會有衝動既行為,可能係狂買野、做高風險投資、巨額賭博,進行高風險性行為等等。而抑鬱狀態,就同之前介紹既抑鬱症一樣。

處於躁狂狀態既心情其實好矛盾,一方面真係精力旺盛做到好多嘢,好high,但去到某個位就會好辛苦,好攰,控制唔到自己,想訓又訓唔到,想停又停唔到。躁狂狀態完又會陷入一段抑鬱狀態,成個人又謝哂,無哂電。交替咁出現呢兩個狀態,都咪話唔辛苦。唔了解既人就會覺得有躁鬱症既人好難捉摸,一時一樣。其實,同其他既病一樣,陪住佢地,明白佢地都係受個病形響,唔好怪佢地就好足夠啦,其餘既就交比臨床心理學家同精神科醫生幫手啦。