聆聽模式

以下係進入「聆聽模式」嘅小提示,呢D提示唔單止係朋友唔開心先用,而係日常大大小小嘅傾談都可以用嘅。


1. 靜觀:啟動聆聽模式


你需要平靜落黎,覺察自己嘅感覺,提醒自己聆聽嘅注意事項,溫柔咁關掉平時用開嘅「解決問題模式」同「自動模式」,進入「聆聽模式」。你需要有覺察力去留意言語背後嘅意思,觀察自己同對方嘅嘅回應,覺察自己有冇好好運用聆聽技巧。


只有你平靜落來,靜觀覺察當下一刻,知道自己做緊咩,以下嘅方法先可以發揮效用。


註:自動模式https://goo.gl/lMv9lb


請繼續用靜觀嘅心慢慢閱讀


2. 心在當下


聽人講嘢,切忌撳手機兼左顧右盼,將個心放喺面前同你傾計嘅人身上。你可以用身體語言表達你係聆聽緊,例如係暫停手上嘅工作、望住對方、頭同身都向住對方,比對方感受到你係陪緊佢。


「我响度,你想講嘅我會聽。」


如果無辦法暫停手上嘅工作,你可以時不時望下對方,暗示你係留心聽緊。有時可能好攰、或者有啲動作你做唔到,雖然身體語言有啲唔同,但你仍然可以清楚表明比對方知道,你係聽緊嘅。


3. 有耐性


「聆聽模式」唔係好似平時咁慣咗咩都要比反應,你可以停一停、等一等,俾啲耐性等對方講哂先,大家靜咗都唔緊要。太早打斷對方,會令對方無心機講落去,要明白「表達感受」本身係一件好具挑戰性嘅事,所以你需要耐性,比空間對方去抒發:


「我會陪住你,聽你講。」


見到對方咁苦惱,我哋可能會不知不覺心急咗,無形中畀咗壓力對方。當你覺察到自己心急,可以輕輕咁提醒自己慢落嚟,畀足夠空間對方繼續 。


4. 忌急於畀意見 我哋都會本能咁畀意見,就好似平時工作咁,有問題就解決,「你快D做完D野咪無咁大壓力囉」,「你揾返人人地就會揾返你架啦」。可惜「解決問題模式」會弄巧反拙,令對方覺得你唔明佢。你可以用一啲說話去表示你係聆聽緊,鼓勵對方繼續講: 「嗯嗯...係呀,嗰個人點講呀?」... See More


5. 設身處地 從對方嘅角度出發,幻想下你就係佢。感受下如果自己有呢啲經歷會點諗同有咩感受。你唔係聽緊佢講嘢咁簡單,「著對方對鞋」行下對方行過嘅路,然後你會發現對方有呢啲感受都係可以理解嘅: 「你老細咁對你,我都明點解你會咁唔鐘意返工」 「都係嘅,你之前嘅同事咁唔友善,你依家會驚同事都好明嘅」 要留意噃,肯定對方嘅感受唔等於講大話或者係同意佢,你只係肯定呢啲感受係真實咁存在嘅。


6. 放下批判心 責怪或評論對方嘅感受係最快令對方唔再同你講嘢: 「你呻都無用架啦,處理件事啦」 「你太大反應啦」 「咁小事……」 我哋好慣性會帶住自己嘅想法去聽對方講嘢,當對方嘅想法同自己嘅價值觀有出入,批判嘅聲音就會喺心中自動響起,甚至會忍唔住同對方爭論。如果你覺察到自己責怪或評論咗對方,你可以sa個lum,然後繼續嘗試去了解對方: 「對唔住呀,我頭先都係從自己角度出發,你可唔可以再講多D比我聽,等我明白你多D呀?」 要打破慣性係唔容易,如果你留意到自己批判心起,可以溫柔咁同自己講: 「大家嘅經歷唔同,唔同人有唔同嘅睇法都好自然嘅」 「咁樣諗對我黎講有D怪,不過都可以再耐心聽下」 「我未係好明點解會有人會咁諗,但我都可以嘗試了解下」


7. 複述對方感受 你可以時不時複述對方嘅感受,用自己嘅文字概括對方講嘅嘢 (paraphrase),對方會感覺到你係聆聽緊: 「你好掹掙,唔明點解腦細咁對你」 「好無助,想揾人幫但又驚無人明」 「我唔知我有無理解錯,你覺得好hurt係因為你朋友無出聲維護你」 「聆聽模式」係以對方嘅感受行先,感同身受嘅同時,將呢啲感受話返俾對方聽,等佢知道你想同佢分擔。就算對方話你同佢感受到嘅嘢唔一樣,都唔緊要,只要抱開放嘅心繼續去聆聽對方嘅回應就可以。


8. 反覆練習


每次對話完,回想一下自己有無啟動到「聆聽模式」,自己係點樣用法,對方嘅反應係點,自己回應嘅方式同平時有無唔同,回想下有無一D對話仲係「自動模式」同「解決問題模式」而否定咗對方。


聆聽係要不斷反覆咁練習,係一生嘅學習,長期啟動「聆聽模式」。

---

參考資料: How to Validate Someone's Feelings http://goo.gl/hZ6DdD Listening Skills http://goo.gl/9nMI7J Things Good Listeners do differently http://goo.gl/7e9jHA How to be a Good Listener http://goo.gl/0o79tu

124 次瀏覽

© 2019 StoryTaler Hong Kong Co. Limited.