點解我心理治療同藥物一D用都無?

讀者問:

為什麼我的心理治療和藥物一點作用都沒有?


說書人分享:


心理治療同藥物無作用嘅原因可以好多。其中一個原因係心理治療同藥物都係需要時間去起作用嘅,有時候我哋喺接受治療嘅開初可能會出現一啲波幅,又或者未感受到個作用,呢啲都係有機會出現嘅情況。


另外,每一個人需要嘅治療方式都係唔一樣嘅,就算兩個有相同病徵嘅人去接受心理服務,治療方式都可以好唔一樣。同樣地,兩個人服用同一種藥物都可以有好唔同嘅效果。心理治療同藥物治療都係按照唔同人嘅需要而制定唔同方案嘅。


如果你覺得無效,而你又信任對方嘅話,不妨如實講返你感受到嘅治療效果畀服務提供者知道,服務提供者係有責任解釋畀你聽嘅,佢亦有責任繼續同你一齊搵出一個最適合你嘅方法。


最後都可以試下問自己,咩為之「有作用」,於你而言,點樣先為之「有用」?例如你想透過治療做到啲咩?想治療幫到你邊方面嘅情況?呢啲問題都可能會幫到你同服務提供者繼續去傾,繼續去搵出一個對你真正有效嘅治療方案。

14 次瀏覽

© 2019 StoryTaler Hong Kong Co. Limited.