微歧視學堂

之前同大家提起過微歧視(microaggression),其實透露咗對某群體嘅刻板印象,好似我地講笑咁叫人「痴線入青山」,其實有暗指有精神病經歷嘅人係痴線嘅意思。微歧視可以係有意或無意,可能係言語上或者行為上嘅表達。絕大部份嘅人都唔係刻意咁想去歧視,有時講嘅說話更可能出自好意,但就不知不覺間傷害咗人都唔知。 語言同思想密不可分,我地講嘅嘢會塑造思想,思想亦都會塑造我地講嘅野。今次就同大家睇下常見嘅微歧視啦。



「入青山啦你」

潛台詞:「精神病係可以用來開玩笑嘅」


呢句說話相信唔少人都會聽過講過,可能係同朋友講笑咁講,亦可能係嬲起上黎鬧人果陣講用。但其實青山醫院都係讓人接受治療同休養嘅地方,當我地拎左佢黎講笑時,彷彿就好似精神病係可以拎黎開玩笑咁。試想下,如果將青山換做其他病房,例如係癌症病房,好有可能大家未必笑得出。


「你咁開心,點會有病呀?」

潛台詞:「有抑鬱症嘅人係有樣睇嘅」


當鼓起咗勇氣,同朋友講自己嘅經歷時,有時可能會俾人話「唔似」,甚至被質疑係唔係講緊笑。其實,有抑鬱症嘅人唔係每一秒都好唔開心,有焦慮症嘅人亦唔係時時刻刻都提心吊膽嘅。就算被診斷有同一個精神病,好多時,一百個有抑鬱症嘅人會有一百個唔同既經驗同故事。


「某官員有精神分裂」

潛台詞:「有精神病嘅人係次等嘅」


有時睇香港嘅新聞,見到某啲政治人物老是常出現真係會好炆。當聽到佢地某啲言論時,好多人都會忍唔住咁鬧:「有病就唔好做官啦」。不過鬧還鬧,當我地咁講嘅時候,其實就係間接講緊有精神病嘅人唔配做某啲職位,或者享有某啲權利。下次真係鬧嘅時候,不妨用下其他形容詞,盡量客觀描述果個人既言行,例如漠視民意、不合邏輯、前言不對後語等等,免得有精神病經歷嘅人躺著也中槍。


(知道/懷疑對方有精神病經歷之後刻意行遠啲)

潛台詞:「精神病係危險嘅」


好多人都會誤以為有精神病嘅人係暴力嘅,而唔少新聞並會將暴力同精神病直接掛勾,就算冇証據都會寫「疑似有精神病」。當知道或者懷疑某個人有精神病經歷時就行開,或者遠離佢,就係因為覺得對方係變幻莫測,係危險嘅。其實,與其因為對方嘅某個身份而做出某啲反應,我地可以單純留意行為本身。如果對方真係做咗令你不安、困擾嘅事,例如騷擾,或者意圖傷害你,無論對方有冇精神病,都應該馬上避開同埋搵人幫手。


「嗰個人講嘢九唔搭八,勁唔合理。有病就去睇醫生啦!」

潛台詞:「有精神病嘅人係唔合理嘅」


當眼前有人行徑同大眾唔同,講嘢你聽唔明時,好多時講笑都會話「果個人精神有問題」,但其實受精神病困擾嘅人係冇樣睇架。有精神病嘅人可以講嘢好有條理,亦可以好平常咁番工番學,過平常嘅生活,做自己要做嘅事。而就算係冇精神病嘅人,都可能會難以用言語或者行動去表達自己,亦可以做出一啲大眾唔會做嘅事嘅。


「啲康復者好叻喎,估唔到佢識咁多英文!」

潛台詞:「有精神病嘅人能力係弱嘅」


其實唔同背景、學歷、職業嘅人都有機會受精神病同情緒病嘅影響。但唔少時候,大家都會好驚訝有經歷嘅人士可以做到某啲其實唔少人都會做到嘅事,例如係入大學,番工,又或者係聽得明英文。而當大家知道佢做到嘅時候,就會好驚訝咁讚嘆:「好勁呀,你英文竟然咁好。」當然,好多時呢啲都係真誠嘅讚美,但同時我地值得去深思,我地對有精神病經歷嘅人係咪有一啲假設呢?


(同你傾訴自己唔開心嘅事)

「你係唔係抑鬱病發作呀?」

潛台詞:「咩都關個病事」


就同所有人一樣,有時自己有少少唔開心,都會想同人傾訴一下。但好多時,對方可能會馬上就回應:「吓,你係唔係抑鬱症又發作呀,你有冇食藥呀?」當然,呢啲都係善意嘅關懷,但當一個人所有行為都被看成病徵,我地就會好容易將個病睇成一個人嘅全部,而忘記咗一個人嘅整全性。


其實好多時我地並唔係有心去出言傷害人,有時甚至係出於關心或者好意。所以當講微歧視嘅時候,唔係要去責怪邊個,而係去了解到我們冇一個人可以完全感受到另一個人嘅經歷同感受,有時亦會忽略咗對方嘅心情。關心同守護都好需要去學習㗎,因為我地每一個都好獨特,同人相處亦冇白紙黑字嘅規則。就好似同任何人相處一樣,當唔小心傷害咗對方時,可以真心咁道歉,同對方溝通番就可以啦。


---延伸閱讀---

關於精神病的一些事:https://goo.gl/i1cLDQ

關於精神病的迷思與正解:https://goo.gl/BXK1GZ


Reference:

Gonzales, L., Davidoff, K. C., Nadal, K. L., & Yanos, P. T. (2015). Microaggressions experienced by persons with mental illnesses: An exploratory study. Psychiatric rehabilitation journal, 38(3), 234.

71 次瀏覽