世界有好多要求,唔好忘記好好照顧自己

鈴......一向無咩人會打電話畀我,低頭一睇係家人電話,就接電話:


「喂!我腳腫發炎,加上發燒,去左睇急症。醫生話我細菌感染需要留院。你快D嚟啦。 」


聽到之後內心好焦急同擔心,就盡快衝入醫院睇睇。處理完手續後,帶住疲累嘅身軀坐車返屋企,當返到屋企打算盡快休息時,發現家人嘈緊交。


「你自己好好反省下,究竟邊個做錯野! 」嘭!大門一響,家人衝咗落街,另外家人極憤怒下衝向廚房拎咗刀想衝出去。我衝出嚟去阻止,成功攞走家人手上嘅刀。家人繼續不停鬧同埋嘗試撼頭埋牆,我用盡努力保護佢。


「你唔好阻住我去死,我死左就唔使煩!今日我條命留係度有咩用,就係畀你地一個二個激親! 」


默默聽咗家人呻,溫柔咁問佢:「知道你都很嬲,聽到你講咁耐,我倒杯水比你飲好嗎?」


佢飲水後仍然繼續不停罵,而我默默咁聽、陪伴。留意到佢嘅語氣慢慢平和後,我講:「我明白你點解咁嬲佢,你都勞動左成日,攰嗎?而家已經凌晨時份,畀我同你好好地休息,之後再處理,好嗎? 」


自己一衝入房「呀!」內心好想喊同大叫!每日返工返學已經承受唔少壓力,當家人突然間入咗醫院,而另外家人因為一啲事刺激到佢情緒不停行動去傷害自己時,我拎起紙筆不停亂畫,覺得攰就瞓咗落床嘗試去瞓。


第二日,醒咗依然繼續返工,用咗大量工作令自己身心麻木忘記屋企嘅事。當有同事開聲講:「一點啦,仲唔食飯?」我先發現身體餓到不停大叫:「做咩唔理我呀?!」我帶住疲累嘅身驅買咗少少食物,咬咗幾啖,發現自己嘅身體原來咁渴望我去照顧佢、在乎佢。再飲多幾啖水,停落嚟,感受到自己壓力好大,真係好疲累,接受自己唔係乜嘢都處理到。


「喂!你放工未,今晚有無野做?無野做就出嚟見下面,好嗎?」一向有事都想搵人傾嘅我,今次推咗朋友邀請。探完病後,我選擇自己一個係公園慢慢行下,呆坐,望住個天,比空間自己一個人靜下同休息一下。


呢個世界有好多需要同要求時,唔好忘記學習好好照顧自己。


By Chocolate

0 次瀏覽